Über eus

Hoi Zäme, mir sind drü Fraue, Bettina, Karin und Sabrina us Birmestorf wo eus quasi gfunde hend. Us Fründschaft isch es gmeinsams Ziel worde. Erfahr meh öber eus:

Min Name isch Karin Ebner. Ich bin 1986 gebore. Mit mine Eltere, minere Schwöschter und mim Brüeder in Remige ufgwachse. Chum han ich chönne laufe, bin ich au scho devo gsprunge. En chline Wildfang. Ich han welle uf Entdeckigsreis, die Wält mit ihrne viele schöne Sache erkunde und kei Ziit verlüre. So isches bliebe bis hüt. Zfriede bin ich, wenn öpis lauft. So chunnts au, dass ich immer wieder mal öpis neus usprobiere oder guet beschäftigt bin mit verschiedene Hobbies und Projekt.

Wo min ältere Sohn, Jg 2017, churz vor em Chinzgiitritt gstande isch, simmer in Birmenstorf AG sässhaft worde. Schnell hend mir eus igläbt und scho di erste Chinzgi-Gspänli känneglernt. So isches cho, dass d'Sabrina, d'Bettina und ich eus troffe hend, zum zäme was unterneh mit eusne Chindergartechind. Min chline Sohn, Jg 2022, probiert mit de grosse mitzcho und fühlt sich au wohl i dere Rundi. Im Sommer ide Badi isches gsi, wo mer Sprüch gmacht hend, mir chönnted ja zäme öpis ufd Bei stelle, "guet näihe cha doch d'Sabrina" und " Bettina mit Marketing und Ichauf kennsch du dich doch guet us?". "Ich han neuerdings en Plotter". So würded mir eus doch super ergänze. Nume Witzli und Sprüch sinds gsi, bis mer sie gnueg oft gseit händ, dass mir grad sälber agfange hend dra glaube.

Und so isch s'Butterblüemli entstande. Mit viel Liebi und Elan händ mir jetzt alles geh, zum tolli Sache für euch herstelle. Alles gmacht und erstellt ide Schwiz, vo eus drüne.

Sabrina Berlinger , Jg 1987 , ich wohne sit bald 4 Johr i Birmenstorf mit mine Zwilling. Ufgwachse bini in Winige ZH.

Sitem Summer dörf ich mich voll kreativ usläbe und ha sozäge mis Hobby zum Job gmacht. Näbed mim Job als Notfallpflegerin, isch das e super Abwächslig. Au de Ustusch mit de Karin und de Bettina isch immer spannend und witzig.

Bettina Jäger, Jg 1986, ich chume ursprünglich us Bade AG. Mir sind aber sit meh als 10 Jahr jetzt do im wunderschöne Birmenstorf. Mir, das heisst min Ma de Stefan und mini chli Tochter Jg 2018. S'Butterblüämli isch für mich es Herzensprojekt, öbis neus, spannends und kreativs. Es macht Spass mit zwei so guete, lustige Fraue zämezschaffe und Neus ufd Bei zstelle, was meischtens bimene luschtige Obig als Idee sin Ursprung hed. S Spannende isch, mir entwicklet eus stetig witer, hend alli en Berg vo Idee im Chopf und drum derfet ihr gspannt si, was no alles werd cho.

Hesch Frage? denn kontaktier eus doch direkt under info@butterbluemli.ch